Dështimi opozitar është i dukshëm dhe sipas Ilir Dedës, bashkëthemelues i Alternativës, po bëhet për fajin e vetë partive opozitare të cilat nuk po janë të gatshme ta kundërshtojnë idenë për ndarje të kufijve.

Ilir Deda kishte lutur dy grupet më të mëdha opozitare për ta kundërshtuar idenë e presidentit Hashim Thaci përmes daljes në rrugë dhe organizimit të protestave. As Vetëvendosja e as LDK nuk pranuan.

“E kam lut Vetëvendosjen dhe LDK-në, nuk ka qenë negociatë, ia kam shtruar njerëzve vendimmarrës, ‘hajde po dalim në rrugë, hajde po dalim në rrugë’. LDK ka thanë që ‘nuk janë pjek kushtet’ e këtë nuk e kuptoj sepse nëse s’janë pjek kushtet kur hapet sovraniteti i Kosovës atëherë nuk e di se kur hapet ndërsa Vetëvendosja ka qenë e kënaqur me protestën e 29 shtatorit, kanë thënë se e ndalën Thaçin”, ka thënë Deda.

“Njerëzit kanë frikë prej dialogut me Serbinë, të gjithë, prej partisë teme e tutje sepse luajtja e Thaçit me shtetësi ka shkaktuar panik edhe janë inatet. Vazhdoj me pa që bashkëpunimi politik ka të bëjë me tema të caktuara e nëse për shtetësi të Kosovës partitë politike nuk arrijnë të gjejnë gjuhë të përbashkët atëherë faleminderit shumë”.

“Kur i ke të gjitha mundësitë, i ki 82% të popullit kundër, atëherë s’duan në rrugë, s’duan në Kuvend atëherë çka po duan. Këto janë qyfte”.

Sipas Dedës, janë bërë të gjithë “Thaçi” të vegjël pasi sipas tij, Thaçi është ai që bën ashtu siç do ai dhe kushtëzon çdo gjë për t’u bërë siç do ai.